airplanebooksbriefcase business cogs cross election entertainment fish house law lockmedicalpeopleselfservices socialtax

Inatsit qaqugukkut atuutissava

Inuit pillugit paasissutissat

nunnut paasissutissanik suliarinnittarneq pillugu inatsit pingaarnertut paasissutissanik inunnut
tunngasunik suliarinninnermut kisimi atuuttarpoq, tassa inunnut inatsisitigut
akisussaatinneqarsinnaallutillu akisussaaffeqartunut. Inatsimmili malittarisassat ilaat suliffeqarfinnut,
peqatigiiffinnut assigisaannullu paasissutissanik suliarinninnermut atuupput. Pingaartumik akiligassanut
tunngasunik paasissutissanik suliaqartarfinnut malittarisassanut tunngatillugu.

Paasissutissat inunnut tunngasut tassaapput suulluunniit inunnut ataasiakkaanut atatinneqarsinnaasut,
naak tamanna inuup normuanik, nalunaarsorneqarnermut normuanik assigisaanilluunniit
ilisimasaqarnissamik pisariaqartitsiffiussagaluartoq. Aamma paasissutissat ass. assinut, inuup nipaanut
imaluunniit assaat ipaannut tunngasut ilaatinneqarput.

Assersuutigalugu ateq, imaluunniit najugaq ilisarnaammik taarserneqarsimappat, paasissutissap
inummut tunngasup pileqqaarfianut atatinneqarsinnaappat paasissutissaq inummut tunngasoq suli
pineqassaaq. Taamaattumik paasissutissat paasiuminaallisakkat aamma ilaatinneqarput, paasissutissat
arlaata atuarneqarsinnaasunngortissinnaappagit, taamalu inuit paasissutissani pineqartut
ilisarnarsisillugit. Paasissutissat ima ilisarnarunnaarsarneqarsimatigisut, nalunaarsorneqarsimasoq
kinaassusersineqarsinnaajunnaarsillugu, nassuiaammi ilaatinneqanngillat, taamalu aamma inunnut
paasissutissanik suliarinnittarnermut inatsimmi ilaatinneqaratik.

Elektroniskimik paasissutissanik suliarinninneq

Taaguut (paasissutissanik) suliarinninneq inuit pillugit paasissutissanik suliarinnernut tamanut tunngavoq.
Suliarinninnerit nalinginnaanerpaat tassaapput katersuineq, nalunaarsuineq, toqqortaateqarneq,
atuineq, ingerlatitseqqinneq, ataatsimut ingerlassineq aamma peersineq.
Pisortat aamma namminersortut ingerlatsiviini paasissutissanik inunnut tunngasunik suliarinninnermi,
”elektroniskimik paasissutissanik suliarinninneq” ikiorsiullugu suliarineqartuni inatsit siullertut atuuppoq.
Tassa imaappoq, inatsit atuuppoq paasissutissat inunnut tunngasut qarasaasiaq iluaqutigalugu
suliarineqaraangata, ass. allakkanik allannermi, imaluunniit paasissutissat inunnut tunngasut
aaqqissuullugit suliarineqarnerini. Tassa elektroniskimik paasissutissanik suliarinninnermi,
paasissutissanik inunnut tunngasunik ilaqartuni, nalinginnaasumik allakkiorneq ilaavoq. Inatsit aamma
atuuppoq paasissutissanik inunnut tunngasunik interneti aqqutigalugu nassitsinermi, imaluunniit
nittartagaq aqqutigalugu tamanut saqqummiussinermi.

Nammineerluni nalunaarsuiffiit

Inatsit aammattaaq atuuppoq, paasissutissat nammineerluni nalunaarsuiffinnut ilanngunneqassappata.
Taamaattumik pisortat aamma namminersortut ingerlatsiviini aaqqissuussamik inuit pillugit
paasissutissanik katersuineq, ass. pappialanngorlugit nalunaarsuiffiit imaluunniit nalunaarsuiffiit,
inatsimmi aamma ilaatinneqarput. Tamanna aamma atuuppoq inuup sananeqaataanik
nalunaarsuiffinnut, ass. aammik-imaluunniit timip ipiutaasartaanik misiligutinut katersuiffinnut.

Allanik aaqqissuussamik suliarinninneq

Tamatuma saniatigut inatsit namminersortut ingerlatsiviini, inuit pillugit paasissutissanik
elektroniskiunngitsumik aaqqissuussamik suliarinninnermi, annertujaartumik atuuppoq, paasissutissat
inunnut namminernut tunngalluinnartut imaluunniit aningaasaqarnerannut tunngasut ilaagaangata.
Taakku tassaasinnaapput sulisoqarnermut allaffiup sulisut ataasiakkaat pillugit sulianut mappiinut,
aningaaseriviup atuisunut ataasiakkaanut tunngatillugu sulianut mappiinut, imaluunniit
eqqartuussissuserisup sulianut mappiinut. Kisianni pisortat oqartussaqarfiini paasissutissat sulianut
mappiniittut tunngaviusumik inatsimmut ilaatinneqarajunngillat.